அமேசான் பிரைம் ட்ரெண்டிங்கில் 2வது இடம் பிடித்த வரலட்சுமியின் 'எஸ்.சரஸ்வதி'

தெலுங்கில் வரலட்சுமி சரத்குமார் இயக்கி தயாரித்து கதையின் நாயகியாக நடித்து கடந்த மார்ச் 6ம் தேதி திரைக்கு வந்த படம் 'எஸ்.சரஸ்வதி'. க்ரைம் திரில்லர் கதையில் உருவான இந்த படத்தில் அவருடன் பிரகாஷ்ராஜ், பிரியாமணி உள்ளிட்ட பலர் முக்கிய வேடங்களில் நடித்தார்கள். ஆனால், இந்த படம் தியேட்டரில் எதிர்பார்த்தபடி வெற்றி பெறவில்லை.

இந்த நிலையில், ஏப்ரல் மூன்றாம் தேதி இந்த எஸ்.சரஸ்வதி படத்தை அமேசான் பிரைம் வீடியோவில் வெளியிட்டார்கள். அதையடுத்து இந்தியா முழுவதும் இந்த படம் ட்ரெண்டிங்கில் இரண்டாவது இடத்தை பிடித்துள்ளது. தியேட்டருக்கு வரும் ரசிகர்கள் மத்தியில் ஈர்ப்பை ஏற்படுத்தாத இந்த படம் இல்லத்தரசிகளின் சிறப்பான வரவேற்பை பெற்று இருக்கிறது.

தன் குழந்தையை பாதுகாக்க அதீத முயற்சிகளுக்கு தள்ளப்படும் ஒரு தாயின் கதையில் இந்த படம் உருவாகியுள்ளது. உணர்ச்சி ஆழம் சஸ்பென்ஸ் நிறைந்த கதைகளும் இரண்டாவது பாதியில் பல திருப்பங்களை கொண்ட இந்த படம் ஓடிடி பார்வையாளர்களை கவர்ந்து இழுத்து வருவதால் உற்சாகம் அடைந்திருக்கிறார் வரலட்சுமி சரத்குமார்.

இது குறித்து அவர் வெளியிட்டுள்ள செய்தியில், 'திரையரங்குகளில் ஏற்பட்ட பின்னடைவு மனச்சோர்வை ஏற்படுத்தினாலும், ஓடிடியில் கிடைத்திருக்கும் இந்த வரவேற்பு உற்சாகமளிக்கிறது. இது ஒரு இயக்குனராக எனது திறமைக்கு கிடைத்த நல்ல அங்கீகாரம் ஆகும்' என்று தெரிவித்திருக்கிறார்.