ஆமதாபாத்: குஜராத் அணிக்கு எதிரான பிரிமியர் போட்டியில் பஞ்சாப் அணி, 11 ரன் வித்தியாசத்தில் வெற்றி பெற்றது. பேட்டிங்கில் 'சிங்கம்' போல சிலிர்த்த, பஞ்சாப் கேப்டன் ஷ்ரேயஸ் 42 பந்தில் 97 ரன் குவித்தார்.

குஜராத்தின் ஆமதாபாத்தில் உள்ள உலகின் பெரிய மோடி மைதானத்தில், நேற்று நடந்த பிரிமியர் லீக் போட்டியில் குஜராத், பஞ்சாப் மோதின. 'டாஸ்' வென்ற குஜராத் கேப்டன் சுப்மன் கில், பீல்டிங் தேர்வு செய்தார்.

அசத்தல் அறிமுகம்

பஞ்சாப் அணிக்கு அறிமுக வீரர் பிரியான்ஷ் ஆர்யா, பிரப்சிம்ரன் சிங் (5) ஜோடி துவக்கம் கொடுத்தது. அடுத்து வந்த கேப்டன் ஷ்ரேயஸ், பவுண்டரி அடித்து ரன் கணக்கைத் துவக்கினார். போட்டியின் 5வது ஓவரை வீசினார் அர்ஷத். இதில் ஆவேசம் காட்டிய ஆர்யா, 4, 4, 6, 4 என அடிக்க, 21 ரன் எடுக்கப்பட்டன. ஆர்யாவை (47 ரன், 23 பந்து) வெளியேற்றினார் ரஷித் கான்.

சாய் கிஷோர் 'மூன்று'

பஞ்சாப் அணி 10.2 ஓவரில் 105/2 ரன் என வலுவாக இருந்தது. 11வது ஓவரை வீசிய சாய் கிஷோர், 3 வது பந்தில் ஓமர்சாய் (16), 4வது பந்தில் அபாயகரமான மேக்ஸ்வெல் (0) என இருவரையும் திருப்பி அனுப்ப, சற்று திணறியது. அடுத்து, சாய் கிஷோரின் 13வது ஓவரில் ஷ்ரேயஸ் இரண்டு சிக்சர், ஸ்டாய்னிஸ் ஒரு பவுண்டரி அடிக்க, மீண்டும் ரன் 'வேகம்' எடுத்தது.

ஷ்ரேயஸ் அரைசதம்

ரஷித்கான் ஓவரில் அடுத்தடுத்த சிக்சர் அடித்த ஷ்ரேயஸ், 27 வது பந்தில் அரைசதம் அடித்தார். மீண்டும் வந்த சாய் கிஷோர், இம்முறை ஸ்டாய்னிசை (20) வெளியேற்றினார். 17 வது ஓவரை பிரசித் கிருஷ்ணா வீசினார். இதில் ரன் மழை பொழிந்த ஷ்ரேயஸ், 24 ரன் (6, 4, 6, 6, 2) குவித்தார். மறுபக்கம் ரஷித் கான் ஓவரில் ஷஷாங்க் சிங், 6, 4, 2, 6 என மிரட்ட, பஞ்சாப் அணியின் ஸ்கோர் 18 ஓவரில் 210/5 ரன் ஆனது. பஞ்சாப் அணி 20 ஓவரில் 5 விக்கெட்டுக்கு 243 ரன் குவித்தது. ஷ்ரேயஸ் (97), ஷஷாங்க் (44 ரன், 16 பந்து) அவுட்டாகாமல் இருந்தனர்.

சுதர்சன் நம்பிக்கை

கடின இலக்கைத் துரத்திய குஜராத் அணிக்கு சாய் சுதர்சன், சுப்மன் கில் ஜோடி சூப்பர் துவக்கம் கொடுத்தது. 5.5 ஓவரில் 61 ரன் சேர்த்த போது, சுப்மன் (33 ரன், 14 பந்து) அவுட்டானார். அடுத்து இணைந்த சாய் சுதர்சன், பட்லர் ஜோடி மின்னல் வேக ரன் குவிப்பை வெளிப்படுத்தியது. சாய் சுதர்சன் அரைசதம் எட்டினார்.

இரண்டாவது விக்கெட்டுக்கு 40 பந்தில் 84 ரன் சேர்த்த போது, சாய் சுதர்சன் (74) அவுட்டானார். பட்லர் (54), தன் பங்கிற்கு அரைசதம் கடந்தார். இவரை யான்சென் போல்டாக்க, பஞ்சாப் பக்கம் வெற்றி திரும்பியது. ரூதர்போர்டு போராடினார்.

கடைசி ஓவரில் குஜராத் வெற்றிக்கு 27 ரன் தேவைப்பட்டன. அர்ஷ்தீப் பந்து வீசினார். முதல் பந்தில் டிவாட்யா (6), 4வது பந்தில் ரூதர்போர்டு (46) அவுட்டாக, 15 ரன் மட்டும் எடுக்கப்பட்டன. குஜராத் அணி 20 ஓவரில் 232/5 ரன் மட்டும் எடுத்து தோல்வியடைந்தது. ஷாருக்கான் (6), அர்ஷத் கான் (1) அவுட்டாகாமல் இருந்தனர்.