கோல்கட்டா: வைபவ் சூர்யவன்ஷி, 58 பந்தில் சதம் விளாசி சாதனை படைத்தார்.

சையது முஷ்தாக் அலி டிராபி, 'டி-20' தொடரின் 18வது சீசன் நடக்கிறது. நேற்று கோல்கட்டா, ஈடன் கார்டன் மைதானத்தில் நடந்த 'பி' பிரிவு லீக் போட்டியில் பீஹார், மகாராஷ்டிரா அணிகள் மோதின. மகாராஷ்டிரா 'டாஸ்' வென்று பீல்டிங் செய்தது.

பீஹார் அணியின் வைபவ் சூர்யவன்ஷி பவுண்டரி (7), சிக்சர் (7) மழை பொழிந்தார். 58 பந்தில் சதம் கடந்தார். இத்தொடரில் சதம் அடித்த இளம் வீரர் என சாதனை படைத்தார். பீஹார் அணி 20 ஓவரில் 176/3 ரன் எடுத்தது. வைபவ் (61 பந்து, 108 ரன்), ஆயுஷ் (25) அவுட்டாகாமல் இருந்தனர்.

பின் மகாராஷ்டிரா அணிக்கு கேப்டன் பிரித்வி ஷா (66), நிராஜ் ஜோஷி (30) ரன்ஜீத் (24) கைகொடுக்க, 19.1 ஓவரில் 182/7 ரன் எடுத்து, 3 விக்கெட்டில் வெற்றி பெற்றது.

தமிழகம், கர்நாடக அணிகள் மோதிய போட்டி ஆமதாபாத்தில் ('டி') நடந்தது. கர்நாடக அணி 20 ஓவரில் 245/3 ரன் எடுத்தது. தேவ்தத் படிக்கல் (102), ஸ்மாரன் (46) அவுட்டாகாமல் இருந்தனர். கடின இலக்கைத் துரத்திய தமிழக அணி 14.2 ஓவரில் 100 ரன்னில் சுருண்டு, 145 ரன் வித்தியாசத்தில் தோற்றது.

ஐதராபாத்தில் நடந்த போட்டியில் ('சி') பரோடா, பஞ்சாப் மோதின. பஞ்சாப் அணிக்கு கேப்டன் அபிஷேக் (50), அன்மோல்பிரீத் (69) உதவ, 20 ஓவரில் 222/8 ரன் எடுத்தது. காயத்தில் இருந்த மீண்ட ஹர்திக் பாண்ட்யா (42 பந்து, 77 ரன்), பரோடா அணிக்கு உதவ, 19.1 ஓவரில் 224/3 ரன் எடுத்து, 7 விக்கெட்டில் வென்றது.

நேற்று 61 பந்தில் 108 ரன் எடுத்த வைபவ் (14 ஆண்டு, 250 நாள்), சையது முஷ்தாக் அலி டிராபி தொடரில் சதம் அடித்த இளம் வீரர் என சாதனை படைத்தார். முன்னதாக விஜய் ஜோல் (2013ல் 18 ஆண்டு, 118 நாள்) இருந்தார்.

* ஏற்கனவே, 19 வயதுக்குட்பட்ட டெஸ்டில் சதம் அடித்த இளம் வீரர் (13 ஆண்டு, 187 நாள்), இளம் வயதில் 'டி-20' சதம் அடித்த இந்தியர், பிரிமியர் அரங்கில் சதம் அடித்த இளம் வீரர் (14 வயது, 32 நாள்), 19 வயது ஒருநாள் அரங்கில் இளம் வயதில் (14 ஆண்டு, 100 நாள்) சதம் என பல சாதனை படைத்துள்ளார்.