சென்னை, சென்னை மெட்ரோ ரயில்களில் கடந்த ஜூன் மாதத்தில் மட்டும் 84 லட்சத்து 33 ஆயிரத்து 837 பேர் பயணம் செய்துள்ளனர். இதற்கு முந்தைய மாதத்துடன் ஒப்பிடும் போது, 12,727 பேர் அதிகமாக பயணித்துள்ளனர்.

சென்னை மெட்ரோ ரயில் நிறுவன அதிகாரிகள் கூறியதாவது:

ஜூன் மாதத்தில் அதிகபட்சமாக, ஜூன் 21ம் தேதி 3 லட்சத்து 27 ஆயிரத்து 110 பேர் பயணம் செய்துள்ளனர். கியூ.ஆர்., குறியீடு பயணச்சீட்டு முறையைப் பயன்படுத்தி 37,05,316 பேரும், பயண அட்டைகளை பயன்படுத்தி 31,33,011 பேரும், டோக்கன்களை பயன்படுத்தி 30,752 பேரும், குழு பயணச்சீட்டு முறையை பயன்படுத்தி 3,757 பேரும், தேசிய பொது இயக்க அட்டையை பயன்படுத்தி 15,61,001 பேரும் மெட்ரோ ரயில்களில் பயணம் செய்துள்ளனர்.

சென்னை மெட்ரோ ரயில் நிறுவனத்தின் கியூ.ஆர்., குறியீடு பயணச்சீட்டு மற்றும் பயண அட்டை, வாட்ஸாப் டிக்கெட் உள்ளிட்ட டிக்கெட்டுகளுக்கு 20 சதவீதம் கட்டணத் தள்ளுபடி வழங்கப்படுகிறது.

இவ்வாறு அவர்கள் கூறினர்.