சென்னை

ஹாக்கி இந்தியா மாஸ்டர்ஸ் ஹாக்கி முதல் போட்டியில், தமிழக அணி தோல்வியை தழுவியதால், ரசிகர்களிடம் பெரும் ஏமாற்றத்தை ஏற்படுத்தியது.

ஹாக்கி இந்தியா ஆதரவில், ஹாக்கி யூனிட் ஆப் தமிழ்நாடு சார்பில், ஹாக்கி இந்தியா மாஸ்டர்ஸ் தொடர், எழும்பூர் ராதாகிருஷ்ணன் அரங்கில் நடக்கிறது.

தொடரில், நாட்டின் 20 மாநிலங்களைச் சேர்ந்த, ஆடவர் பிரிவில், 12 அணிகள், மகளிர் பிரிவில் எட்டு அணிகள் பங்கேற்றுள்ளன. ஒவ்வொரு அணியும் தன் பிரிவில் இடம் பெற்றுள்ள மற்ற அணிகளுடன், தலா ஒரு முறை மோதுகிறது.

நேற்று காலை நடந்த பெண்களுக்கான போட்டியில், தமிழகம் மற்றும் ஹரியானா அணிகள் எதிர்கொண்டன. விறுவிறுப்பான இப்போட்டியில், ஹரியானா அணி, 8 - 1 என்ற கணக்கில் தமிழக அணியை தோற்கடித்து வெற்றி பெற்றது.

தமிழக அணி, தான் விளையாடிய முதல் போட்டியிலேயே தோல்வியடைந்தது ரசிகர்கள் மத்தியில் ஏமாற்றத்தை ஏற்படுத்தியது.

மற்றொரு போட்டியில், பஞ்சாப் அணி, 3 - 1 என்ற கணக்கில், ஒடிசாவை தோற்கடித்தது. போட்டிகள் தொடர்ந்து நடக்கின்றன.