ஆதம்பாக்கம், புழுதிவாக்கம், ஜெயா நகரை சேர்ந்தவர் வடிவேல், 47. இவர், ஆதம்பாக்கம், ஆபீசர்ஸ் காலனியில் காய்கறி கடை நடத்தி வருகிறார். நேற்று முன்தினம், இவரின் கடைக்கு வந்த ஒரு நபர், மாமூல் கேட்டு மிரட்டியுள்ளார்.

வடிவேல் தர மறுத்ததால், அவரை கத்தியால் தாக்கிய நபர், கல்லாப்பெட்டியில் இருந்த, 1,300 ரூபாயை பறித்துக்கொண்டு, காய்கறிகளை கீழே கொட்டி அராஜகத்தில் ஈடுபட்டு, பின் அங்கிருந்து தப்பினார்.

இது குறித்த புகாரின்படி, ஆதம்பாக்கம் போலீசார் அப்பகுதியில் உள்ள கண்காணிப்பு கேமரா காட்சிகளை ஆய்வு செய்தனர்.

இதில், வடிவேலுவிடம் தகராறில் ஈடுபட்டது, ஆதம்பாக்கம், பிள்ளையார் கோவில் தெருவை சேர்ந்த தினேஷ், 33, என்பது தெரியவந்தது.

அவர், அதே பகுதியில் மறைந்திருப்பதாக, போலீசாருக்கு தகவல் கிடைத்தது. அவரை போலீசார் சுற்றி வளைத்த போது, தப்பியோட முயன்று கீழே விழுந்தார். இதில், அவரின் வலது கையில் முறிவு ஏற்பட்டது.

அரசு மருத்துவமனையில், அவருக்கு சிகிச்சை அளித்து விசாரணை நடத்தினர். இதில், அவர் காவல் நிலைய 'ஹிட்-லிஸ்ட்' ரவுடி என்பதும், அவர் மீது ஆதம்பாக்கம் உள்ளிட்ட காவல் நிலையங்களில், பல வழக்குகள் உள்ளதும் தெரியவந்தது.

பின், அவரை கைது செய்த போலீசார், நீதிமன்ற உத்தரவுப்படி சிறையில் அடைத்தனர்.