சென்னை : புதுச்சேரியில், தென்னிந்திய அளவில் நடந்த ஹாக்கி போட்டியில், எஸ்.ஆர்.எம்., பல்கலை மகளிர் அணி 'சாம்பியன்' கோப்பையை வென்றது.

அர்ஜுனா ஹாக்கி கிளப் சார்பில், மகளிருக்கான தென்னிந்திய அளவிலான ஹாக்கி சாம்பியன்ஷிப் போட்டி, புதுச்சேரியின், கூடப்பாக்கத்தில் நடந்தது. இதில், தென் இந்திய அளவில் 20 மாநில கல்லுாரி அணிகள் போட்டியிட்டன. போட்டிகள், முதலில் நாக் - அவுட் முறையிலும், அடுத்து லீக் முறையிலும் நடந்தன.

நாக் அவுட் சுற்றில் அசத்திய எஸ்.ஆர்.எம்., பல்கலை அணி, லீக் சுற்றுக்கு முதல் அணியாக தேர்வு செய்யப்பட்டது. லீக் முதல் போட்டியில் எஸ்.ஆர்.எம்., அணி, அர்ஜுனா அணிகள் மோதின. இதில் 7 - 1 என்ற கோல் கணக்கில் எஸ்.ஆர்.எம்., அணி வெற்றி பெற்றது. மேலும் அடுத்த போட்டியில் ஈரோடு மாவட்டத்தின் பி.கே.ஆர் அணியை எதிர்த்து போட்டியிட்டது. போட்டி 5 - 5 என்ற கணக்கில் டிராவில் முடிந்தது.

லீக் முடிவில் எஸ்.ஆர்.எம்., அணி ஐந்து புள்ளிகளுடன் முதல் இடம் பிடித்து, கோப்பையை கைப்பற்றியது. இரண்டாவது இடத்தில் ஈரோட்டின் பி.கே.ஆர்., அணி உள்ளது.