நீதிமன்ற வழக்கால் ரூ.60 கோடி நிலுவை சென்னை மாநகராட்சியில், 2022ல் சொத்து வரி உயர்த்தப்பட்டப்போது, பலருக்கு அதிகமாக வரி போடப்பட்டதாக குற்றச்சாட்டு எழுந்தது. இதை எதிர்த்து, 200க்கும் மேற்பட்டோர் உயர் நீதிமன்றத்தில் வழக்கு தொடர்ந்தனர். இந்த வழக்கு நீதிமன்றத்தில் நிலுவையில் உள்ளது. அவர்களின் பிரச்னைக்கு, மாநகராட்சி தீர்வு ஏற்படுத்தியதால், நீதிமன்றத்தில் வழக்கு தொடர்ந்தவர்களில், 160க்கும் மேற்பட்டோர், மாநகராட்சிக்கு முறையாக சொத்து வரியை செலுத்தி வருகின்றனர். மேலும், நீதிமன்ற வழக்கை திரும்ப பெறுவதாகவும் மனு தாக்கல் செய்துள்ளனர். ஆனால், நீதிமன்றத்தில் வழக்கு விசாரணைக்கு பட்டியலிடப்படாததால், அவை நிலுவை வழக்குகளாக உள்ளன. அதேநேரம், நீதிமன்ற வழக்கு காரணமாக, 60 கோடி ரூபாய் சொத்து வரி நிலுவை இருப்பதாக, மாநகராட்சி முதுநிலை வருவாய் அலுவலர் பாலச்சந்தர் தெரிவித்தார்.