சென்னை: 'தீபாவளி பண்டிகை, தேசிய விடுமுறை நாளான வரும் 20ம் தேதி, ஞாயிறு கால அட்டவணைப்படி, மின்சார ரயில்கள் இயக்கப்படும்' என அறிவிக்கப்பட்டுள்ளது.

சென்னை, புறநகர் பகுதிகளில் தினமும் 550 மின்சார ரயில்கள் இயக்கப்பட்டு வருகின்றன. இருப்பினும், ஞாயிறு மற்றும் பண்டிகை நாட்கள், தேசிய விடுமுறை நாட்களில் வழக்கமாக, 40 சதவீத ரயில்கள் குறைத்து இயக்கப்படும்.

அந்த வகையில், தீபாவளி பண்டிகையான வரும் 20ம் தேதி, தேசிய விடுமுறை என்பதால், சென்னை கடற்கரை - செங்கல்பட்டு, சென்ட்ரல் - அரக்கோணம், சூலுார்பேட்டை, வேளச்சேரி என, அனைத்து மின்சார ரயில் தடங்களிலும், ஞாயிறு கால அட்டவணைப்படி மின்சார ரயில்கள் இயக்கப்படும்.

இதேபோல், ரயில் டிக்கெட் முன்பதிவு மையங்கள் அனைத்தும் வரும் 20ம் தேதி ஒரு ஷிப்ட் மட்டுமே இயங்கும். அதாவது, காலை 8:00 மணி முதல் மதியம் 2:00 மணி வரை மட்டுமே செயல்படும் என, சென்னை ரயில்வே கோட்டம் நேற்று தெரிவித்துள்ளது.