கோவை: பாரதியார் பல்கலைக்கு உட்பட்ட கல்லுாரிகளுக்கு இடையே ஆண்களுக்கான கூடைப்பந்து போட்டி பி.எஸ்.ஜி. கலை அறிவியல் கல்லுாரி மைதானத்தில் 3ம் தேதி துவங்கியது; இன்று முடிகிறது. இதில், 32 அணிகள் பங்கேற்றுள்ளன.

டாக்டர் எஸ்.என்.எஸ்., ராஜலட்சுமி கல்லுாரி அணி, 68-37 என்ற புள்ளிகளில் இந்துஸ்தான் கல்லுாரி அணியையும், பாரதியார் பல்கலை அணி, 51-12 என்ற புள்ளிகளில் நேரு கலை அறிவியல் கல்லுாரி அணியையும் வென்றன.

பல்வேறு சுற்றுகளை அடுத்து நடந்த முதல் காலிறுதி போட்டியில், பி.எஸ்.ஜி. கலை அறிவியல் கல்லுாரி அணி, 68-12 என்ற புள்ளிகளில் கொங்கு கல்லுாரி அணியை வென்றது. இரண்டாம் போட்டியில், குமரகுரு லிபரல் கலை மற்றும் அறிவியல் கல்லுாரி அணி, 66-7 என்ற புள்ளிகளில் ஸ்ரீ ராமகிருஷ்ணா கல்லுாரி அணியையும் வென்றது.

மூன்றாம் போட்டியில், டாக்டர் என்.ஜி.பி. கலை அறிவியல் கல்லுாரி அணி, 73-56 என்ற புள்ளிகளில் டாக்டர் எஸ்.என்.எஸ்., ராஜலட்சுமி கல்லுாரி அணியையும், பாரதியார் பல்கலை அணி, 56-53 என்ற புள்ளிகளில் ரத்தினம் கல்லுாரி அணியையும் வென்று அரையிறுதிக்கு தகுதி பெற்றன.