கள்ளக்குறிச்சி : கள்ளக்குறிச்சி துணைமின் நிலையத்தில் புதிதாக அமைக்கப்பட்ட மின்மாற்றி துவக்கி வைக்கும் நிகழ்ச்சி நடந்தது.

நிகழ்ச்சிக்கு, மின்வாரிய தலைமை பொறியாளர் ராமலிங்கம் தலைமை தாங்கினார். கள்ளக்குறிச்சி துணை மின்நிலையத்திற்குட்பட்ட ஊரக பகுதிகளில் மின்நுகர்வோர் எண்ணிக்கை நாளுக்குள் நாள் அதிகரித்து வருகிறது. இதையடுத்து, துணை மின்நிலையத்தில் உள்ள 16 எம்.வி.ஏ., திறன் கொண்ட மின்மாற்றி, 25 மெகா வோல்ட் ஆம்பியராக மேம்படுத்தப்படுத்தும் பணிகள் கடந்த சில தினங்களுக்கு முன் நடந்தது.

பணிகள் முடிவடைந்த நிலையில், புதிய மின்மாற்றி துவக்க நிகழ்ச்சி நேற்று நடந்தது. மின்வாரிய தலைமை பொறியாளர் ராமலிங்கம் மின்மாற்றியை இயக்கி வைத்தார். நிகழ்ச்சியில், மேற்பார்வை பொறியாளர் (பொறுப்பு) மயில்வாகணன், செயற்பொறியாளர்கள் கணேசன், சுப்புராஜ், திலகர், உதவி செயற்பொறியாளர்கள் கேசவேல், கோபிநாத், மோகன், சங்கர் மற்றும் உதவி மின் பொறியாளர்கள், பணியாளர்கள் பங்கேற்றனர்.