மதுரை: மதுரை மீனாட்சி அம்மன் கோயில் ஐப்பசி மாத திருவிழாவில் அக்.20 தீபாவளியன்று அம்மனுக்கு வைர கிரீடம், தங்கக்கவசம், சுவாமிக்கு வைர நெற்றிப்பட்டை அணிவிக்கப்படுகிறது.

அக். 22 முதல் 27 வரை கோலாட்ட உற்ஸவம் நடக்கிறது. அக். 22 முதல் 25 வரை மாலை 6:00 மணிக்கு ஆடி வீதியில் அம்மன் எழுந்தருளி நாயக்கர் மண்டபத்தில் பத்தியுலாத்திய பின் கொலுச்சாவடி சேத்தியாவார்.

அக். 26 மாலை 6:00 மணிக்கு அம்மன் வெள்ளி கோ ரதத்தில் எழுந்தருளி சித்திரை வீதிகளில் வீதி உலா வருவார். அக். 27 மாலை 6:00 மணிக்கு மீனாட்சி சுந்தரேஸ்வரர் பஞ்சமூர்த்திகளுடன் வெள்ளி ரிஷப வாகனத்தில் அலங்காரமாகி, ஆடி வீதியில் புறப்பாடு நடைபெறும்.

கந்தசஷ்டி விழா அக். 22 முதல் 27 வரை கந்தசஷ்டி விழா நடைபெறும். அக். 28 காலை 7:00 மணிக்கு கூடல்குமாரர் சன்னதியில், முத்துக்குமாரசுவாமி எழுந்தருளி, அவருக்கு வெள்ளிக் கவசம், பாவாடை சாத்துப்படியும் விசேஷ அபிஷேகம், அலங்காரம், சண்முகார்ச்சனை நடைபெறும். நவ. 1 முதல் 5 வரை திரு பவித்ர உற்ஸவத்தை முன்னிட்டு சந்திரசேகரர் சுவாமி, சன்னதி 2ம் பிரகாரம் வலம்வந்து சேத்தியாவார். நவ. 5 உச்சிக்காலத்தில் சொக்கலிங்கப் பெருமானுக்கு அன்னாபிஷேகம் நடைபெறும்.

ஐப்பசி பூரம் நவ. 14 ஐப்பசி மாத பூரத்தை முன்னிட்டு காலை 10:00 மணிக்கு மீனாட்சி அம்மன் மூலவர் மற்றும் உற்ஸவரை ஏத்தி இறக்கும் சடங்குகள் நடத்தப்பட்டு தீபாராதனை நடக்கும். உச்சிக்காலத்தில் ஆலவட்டத்துடன் உற்ஸவர் அம்மன் சேத்திவந்து சேர்வார்.

ஏற்பாடுகளை கோயில் இணைகமிஷனர் சுரேஷ் செய்து வருகிறார்.