சேலம், நகர்புற உள்ளாட்சி பகுதிகளில் நடைமுறைப்படுத்தப்பட்ட சொத்து வரி, தொழில் வரி உயர்வை திரும்ப பெறுதல் உள்பட, 11 தீர்மானங்கள், பா.ம.க., பொதுக்குழுவில் வலியுறுத்தப்பட்டுள்ளன.

சேலத்தில், ஒருங்கிணைந்த மாவட்ட, பா.ம.க., பொதுக்குழு கூட்டம் நேற்று நடந்தது. அதில் நிறைவேற்றப்பட்ட தீர்மானங்கள் விபரம்:

சேலம் மாவட்டத்தில் உள்ள, 11 சட்டசபை தொகுதிகளிலும், குறைந்தது ஒரு லட்சம் உறுப்பினர்களை சேர்த்தல்; மேட்டூர் அணை உபரிநீரால், 58 ஏரிகளுக்கு மட்டும் தண்ணீர் நிரப்பப்படுவதால், 100 ஏரிகளுக்கும் விரிவுபடுத்தல்;

பனமரத்துப்பட்டி ஏரியை சீரமைத்து, சேலம் மாநகர குடிநீர் தேவைக்கு நடவடிக்கை எடுத்தல்; இரும்பாலையில் கையகப்படுத்தி, பயன்படுத்தாமல் உள்ள நிலங்களை, உரியவர்களுக்கே திரும்ப வழங்குதல்; இரும்பாலை தளவாட மையம் அமைக்க நடவடிக்கை எடுத்தல்.

சேலம் மாவட்டத்தில் வெள்ளி, ஜவுளி மற்றும் கயிறு திரிக்கும் தொழில்களை பாதுகாக்க நடவடிக்கை எடுத்தல்; சேலம் மாவட்டத்தில் மலர்களில் இருந்து வாசனை திரவியம் தயாரிக்கும் ஆலை அமைத்தல்; மாநகராட்சி, நகராட்சி உள்ளிட்ட நகர்புற உள்ளாட்சி பகுதிகளில் நடைமுறைப்படுத்தப்பட்ட சொத்து வரி, தொழில் வரி உயர்வை திரும்பப்பெறுதல்; சேலத்தில் பாதாள சாக்கடை பணியை விரைந்து நிறைவேற்றி, சேதம் அடைந்த சாலைகளை சீரமைத்தல்;

சேலத்தில் போக்குவரத்து நெரிசலை கட்டுப்படுத்த, வெளிவட்ட சாலை அமைக்கும் திட்டப்பணிகளை விரைந்து தொடங்குதல்; இந்திய விடுதலைக்கு பெரும் பங்காற்றிய சேலம் அர்த்தநாரீச வர்மாவின் பெயரை, சேலம் விமான நிலையத்துக்கு சூட்டுதல் ஆகிய தீர்மானங்கள் நிறைவேற்றப்பட்டன.