தொழிலாளர் சொந்த ஊர் பயணம்

பனியன் தொழில் நிமித்தமாக, வேலை வாய்ப்பு தேடி வந்த மக்கள், திருப்பூரிலேயே நிரந்தரமாக தங்க துவங்கிவிட்டனர். இருப்பினும், தீபாவளி மற்றும் பொங்கல் பண்டிகையை சொந்த ஊரில் கொண்டாடுவதையே விரும்புகின்றனர். நடுத்தர வயதுக்கு மேற்பட்டவர்கள், தீபாவளிக்கு சென்றால், அங்குள்ள நிலத்தில் விவசாயம் செய்துவிட்டு, பொங்கல் பண்டிகையை கொண்டாடிவிட்டு திரும்புவது வழக்கம். இந்தாண்டு தீபாவளி பண்டிகைக்கு மூன்று நாள் விடுமுறை. கடந்த இரண்டு மாதமாக பரபரப்பாக இயங்கியதால், பனியன் நிறுவனங்கள், 8 நாள் வரை விடுமுறை அறிவித்துள்ளன. எனவே, வரும், 19ம் தேதி முதல், 26ம் தேதி வரை பெரும்பாலான நிறுவனங்கள் விடுமுறை அறிவித்துள்ளன. இதனால், வெளிமாவட்டங்களை சேர்ந்த குடும்பத்தினர், முன்கூட்டியே சொந்த ஊர்களுக்கு புறப்பட்டு செல்ல துவங்கிவிட்டனர். வடமாநில தொழிலாளர்கள் பெரும்பாலும் தீபாவளி பண்டிகைக்கு செல்வதில்லை; திருப்பூரிலேயே கொண்டாடுகின்றனர். இதனால், அவசர ஆர்டர்கடள, உள்ளூர் மற்றும் வடமாநில தொழிலாளர்களை வைத்து பணிகளை முடிக்க திட்டமிட்டுள்ளதாக, பனியன் நிறவன உரிமையாளர்கள் தெரிவித்தனர்.