மாற்றுத்திறனாளிகள் ஏமாற்றம்
தமிழக அரசின் மாற்றுத்திறனாளிகள் நலத்துறை சார்பில், 21 வகை மாற்றுத்திறனாளிகள் அடையாளப்படுத்தப்பட்டு உள்ளனர். அவர்களின் பாதிப்பு தன்மைக்கு ஏற்ப, 1,500 மற்றும் 2,000 ரூபாய் உதவித் தொகை வழங்கப்படுகிறது. இதை 6,000 ரூபாயாக உயர்த்தி வழங்க வேண்டும் என வலியுறுத்தி, மாற்றுத்திறனாளிகள், கடந்த மாதம் 11ம் தேதி, கலெக்டர் அலுவலகம் முற்றுகைப் போராட்டத்தில் ஈடுபட்டனர். அவர்களுடன் பேசிய தலைமைச் செயலர் 'நிதி நிலையை கருத்தில் வைத்து, உதவித் தொகை உயர்வு அறிவிப்பை முதல்வர் வெளியிடுவார்' என, உறுதி அளித்தார். அதை ஏற்று மாற்றுத்திறனாளிகள், போராட்டத்தை கைவிட்டனர். சர்வதேச மாற்றுத்திறனாளிகள் தினம் அன்று, முதல்வர் உதவித்தொகை உயர்வு அறிவிப்பை வெளியிடுவார் என எதிர்பார்த்தனர். ஆனால், எந்த அறிவிப்பும் வெளியாகவில்லை. இது மாற்றுத்திறனாளிகளிடம் அதிருப்தியை ஏற்படுத்தி உள்ளது.