சென்னை:'தமிழகம், புதுச்சேரியில், இன்று முதல் 25ம் தேதி வரை மழை பெய்யும்' என, சென்னை வானிலை ஆய்வு மையம் அறிவித்துள்ளது.

அம்மையம் வெளியிட்டுள்ள அறிக்கை:

தமிழகத்தில் நேற்று மதியம் நிலவரப்படி, மேற்கு தொடர்ச்சி மலை மாவட்டங்களிலும், இதர மாவட்டங்களில் ஓரிரு இடங்களிலும் மழை பெய்துள்ளது. அதிகபட்சமாக, கோவை மாவட்டம் சின்னக்கல்லாரில் 7 செ.மீ., மழை பெய்துள்ளது.

கோவை மாவட்டம் சின்கோனா, வால்பாறை, நீலகிரி மேல்கூடலுார், நடுவட்டம் பகுதிகளில், தலா 5 செ.மீ., மழை பெய்துள்ளது.

நீலகிரி மாவட்டம் பார்வூட் பகுதிகளில், தலா 4 செ.மீ., மழை பதிவாகியுள்ளது. இதுதவிர, சேலம், நாமக்கல், ஈரோடு, விழுப்புரம் மாவட்டங்களிலும் மழை பெய்துள்ளது.

இதற்கிடையே, மேற்கு திசை காற்றின் வேக மாறுபாடு காரணமாக, தமிழகம் மற்றும் புதுச்சேரி மற்றும் காரைக்கால் பகுதியில், இன்று முதல் 25ம் தேதி வரை, இடி, மின்னலுடன் கூடிய லேசானது முதல் மிதமான மழை பெய்யக்கூடும். அதேபோல, தமிழகத்தில் சில இடங்களில், நாளை வரை வெப்பநிலை சற்று உயரக்கூடும்.

சென்னை மற்றும் புறநகர் பகுதிகளில், இன்று வானம் ஓரளவு மேகமூட்டத்துடன் காணப்படும். நகரின் ஒருசில பகுதிகளில் இடி, மின்னலுடன் மழை பெய்ய வாய்ப்புள்ளது.

இவ்வாறு அதில் கூறப்பட்டுள்ளது.