இந்தியாவிற்கு செல்லும்முன், அங்கு நிலைமை எப்படியிருக்கும் என ஆராய்ந்தேன். பிகினி மற்றும் சிறிய அளவிலான உடைகளை உடுத்தாதே, பழங்கள், புதிய உணவுகளை சாப்பிடாதீர்கள், சுத்தமான தண்ணீர் இருக்காது, அந்த தண்ணீரை நீங்கள் குடிக்க கூட முடியாது என பலரும் பலவிதமான கருத்துகளை தெரிவித்தனர். இருந்தாலும் நம்பிக்கையுடன் சென்றேன்.

உண்மையில், இது ஒரு அற்புதமான இடம். இந்தியாவின் மக்கள் அடர்த்தி என்பது நம்மை அதிர வைக்கும் அளவிற்கு உள்ளது. இப்போது அதிக மக்கள் தொகை கொண்ட நாடாக இந்தியா உள்ளது. பரப்பளவில் அமெரிக்கா உடன் ஒப்பிடும்போது சிறிய நாடாக இருந்தாலும், இவ்வளவு மக்கள் தொகை கொண்ட நாடு இவ்வளவு சுத்தமாக இருப்பதே ஆச்சரியமாக இருக்கிறது.

இந்தியா பெண்களுக்கு பாதுகாப்பற்ற இடம் என சிலர் சொல்கின்றனர். ஆனால், நான் தென் இந்தியாவில் ஒரு பெண்ணுடன் தான் வசித்தேன். எனக்கு எந்த நேரத்திலும் பாதுகாப்பற்ற உணர்வு ஏற்படவில்லை. நான் வயதானவளாக இருக்கிறேன். ஒருவேளை இளம்பெண்ணாக இருந்திருந்தால் வேறு மாதிரியான அனுபமாக மாறியிருக்கலாம். ஒரு வெள்ளைக்காரராக இருப்பதால் என்னை அனைவரும் ஒருமாதிரி பார்ப்பார்கள் என நினைத்தேன். ஆனால் நான் சென்ற இடங்களில் அதுபோன்ற பிரச்னை இல்லை.

இந்தியர்கள், வெளிநாட்டினரை ஏமாற்றுவார்கள் என்றெல்லாம் ஒரு கருத்து இருக்கிறது. ஆனால் நான் சந்தித்த எல்லோரும் மிகவும் நாகரிகமாகவும், அன்பாகவும், நேர்மையாகவும் இருந்தார்கள். என்னை யாரும் ஏமாற்றவில்லை. உண்மையில் சில ஆண்டுகளுக்கு முன்பு, நான் நியூயார்க் சென்றபோது பலமுறை ஏமாற்றப்பட்டேன். உதாரணமாக, 10 டாலர் மதிப்பு கொண்ட ஒரு சிகரெட் எவ்வளவு எனக் கேட்டால், 20 டாலர் என சொல்வார்கள். இந்தியாவைவிட நியூயார்க்கில் தான் நான் அதிகம் ஏமாற்றப்பட்டேன்.