இரவு நேரத்தில் ஏன் தாமதமாக சாப்பிடக் கூடாது...?

இரவில் தொடர்ந்து தாமதமாக சாப்பிடும்போது ரத்த சர்க்கரை அளவு, உடலில் வளர்சிதை மாற்றத்தில் பாதிப்புகள் ஏற்பட வாய்ப்புள்ளது என்பது டயட்டீசியன்களின் அட்வைஸாகும்.

தினமும் காலை 8 மணி முதல் இரவு 7 மணி வரை சாப்பிடுவது ஆரோக்கியத்துக்கு உகந்தது.

மதியம் 12 மணி முதல் இரவு 11 மணி வரை சாப்பிடுபவர்களுக்கு ரத்தத்தில் குளுக்கோஸ், இன்சுலின் மற்றும் கொலஸ்ட்ரால் ஆகியவை அதிகளவில் இருப்பதாக ஆய்வுகள் கூறுகின்றன.

எனவே, உடலிலுள்ள கொழுப்பைக் குறைக்க அல்லது கட்டுப்படுத்த முதலில் உங்கள் இரவு நேர உணவுப் பழக்கத்தைக் கட்டுப்படுத்த முயற்சிப்பது முக்கியமான ஒன்றாகும்.

இரவில் தாமதமாக சாப்பிடும்போது தூங்குவதிலும் தாமதம் உண்டாவதால், தூக்க சுழற்சியில் பாதிப்பு உண்டாகிறது. இரவில் குழப்பமான கனவுகள் உண்டாவதற்கும் இது காரணமாக இருக்கலாம்.

இது பல இரைப்பை பிரச்னைகளுக்கு வழிவகுக்கிறது. உணவு சரியாக செரிமானமாகாமல் வயிற்றில் அதிக அமிலம் சுரப்பதே இதற்குக் காரணம்.

இரவு நேரத்தில் உடலின் வளர்சிதை மாற்றம் குறைகிறது. இது பகலில் உள்ளதைப் போன்று கலோரிகளை எரிப்பதில் பயனுள்ளதாக இல்லாததால், உடல் எடையை அதிகரிக்க வழிவகுக்கும்.

சரியாக தூங்காத போது, மறுதினம் எரிச்சல் மற்றும் மோசமான மனநிலையுடன் எழுந்திருக்க வாய்ப்புள்ளது. உடல் கடிகாரத்திலும் குழப்பம் ஏற்படுவதால், பதட்டம், மனச்சோர்வுக்கு வாய்ப்புள்ளது.

இரவில் தாமதமாக சாப்பிட்டு விட்டு தூங்குவதை தொடர்ச்சியாக செய்யும் போது, உயர் ரத்த அழுத்தம் மற்றும் நீரிழிவு பாதிப்புக்கு வழிவகுக்கும்.