கிருஷ்ணகிரி மாவட்டம், தேன்கனிக்கோட்டை அருகே உள்ள தங்கட்டியை சேர்ந்தவர் நாகம்மா(50). இவர், நேற்று முன்தினம் வக்கீல் ஒருவருடன் சூரமங்கலம் போலீஸில் மனு அளிக்க வந்தார். அவர் அளித்த மனுவை போலீஸார் வாங்க மறுத்ததால், மனுவை பதிவு தபாலில் அனுப்பி வைத்தார். அவர் அனுப்பிய கோரிக்கை மனுவில், என் மகள் அம்மு, 1993ம் ஆண்டு பிறந்தார். அவளுக்கு 18 வயது பூர்த்தியானதை அடுத்து, ஓமலூர், செம்மாண்டம்பட்டியில் திருமணம் செய்து கொடுக்க ஏற்பாடு செய்தேன். ஆனால், எனது மகளுக்கு 18 வயது பூர்த்தி ஆக வில்லை எனக் கூறி, சிலர் அழைத்துச் சென்று சூரமங்கலத்தில் உள்ள பெண்கள் காப்பகத்தில் அடைத்து விட்டனர். பலமுறை காப்பாகத்திற்கு சென்று, என் மகளை பார்க்க முயன்ற போது, அனுமதி மறுக்கின்றனர்.