நிறைய சம்பாதிக்கலாம்' என, விளம்பரம் செய்த மோசடி நபர், கோவையில் 800 பேரிடம் 1.5 கோடி ரூபாய் வசூலித்து கொண்டு மாயமானார்.

பாதிக்கப்பட்டவர்களில் நூற்றுக்கணக்கானோர் போலீஸ் கமிஷனர் அலுவலகத்தை நேற்று முற்றுகையிட்டு புகார் அளித்தனர்.கோவை, பாப்பநாயக்கன்பாளையம், ஜி.எச்., காலனி, 2வது கிராஸ் பகுதியைச் சேர்ந்தவர் சுரேஷ்பாபு(40). இவர் அதேபகுதியில், 'விநாயகா கேண்டில்ஸ் தொழிற்பயிற்சி மையம்' நடத்தி வந்தார். வேலையற்றோர், வீட்டிலிருக்கும் பெண்கள் சுயதொழில் அடிப்படையில் மெழுகுவர்த்தி தயாரித்து விற்பனை செய்யலாம் என்றும், மாதம் தோறும் 30 ஆயிரம் வரை சம்பாதிக்கலாம் என்றும் விளம்பரம் செய்தார். இதைநம்பி, கோவை மற்றும் திருப்பூர் மாவட்டத்தைச் சேர்ந்த ஏராளமான பெண்கள் உள்பட 800 பேர் கடந்த ஆறு மாதங்களில் சுரேஷ் பாபுவை அணுகினர்.ஒவ்வொருவரிடமும் தலா 20 ஆயிரம் முதல் 70 ஆயிரம் வரை வசூலித்த இந்நபர், மெழுகுவர்த்தி தயாரிக்கும் பயிற்சியை அளித்தார். பின்னர், மெழுகுவர்த்தி தயாரிக்க 5,000 ரூபாய் மதிப்பிலான ஆளுக்கொரு 'டையிங் மெஷினை' வழங்கினார். கூடவே, உடைந்து சேதமடைந்த மெழுகுவர்த்திகளையும் கிலோ கணக்கில் வழங்கினார். இவற்றை கிலோ 100 ரூபாய் என்ற விலையில் கொடுத்து, நல்ல முறையிலான மெழுகுவர்த்திகளை தயாரிக்குமாறு கூறி, கிலோ 125 ரூபாய்க்கு திரும்பப் பெற்றார். கிலோவுக்கு 25 ரூபாய் வருமானம் கிடைத்ததால் பலரும் தங்களுக்கு அறிமுகமான நபர்களை இத்தொழிலில் ஈடுபடுத்தினர். ஏறத்தாழ 800 பேரிடம் பணம் வசூலித்திருந்த நிலையில், சில நாட்களுக்கு முன் சுரேஷ்பாபு திடீரென குடும்பத்துடன் மாயமானார்; வீட்டில் பூட்டு தொங்கியது.தாங்கள் தயாரித்த மெழுகுவர்த்திகளை ஒப்படைக்கச் சென்றவர்கள் அதிர்ச்சியடைந்து, சுரேஷ்பாபுவை மொபைல் போனில் தொடர்பு கொண்டனர்; 'ஸ்விட்ச் ஆப்' செய்யப்பட்டிருந்தது. தங்களது முதலீட்டுப்பணம் பறிபோனதால், நூற்றுக்கும் மேற்பட்டோர் நேற்று கோவை மாநகர போலீஸ் கமிஷனர் அலுவலகத்தில் திரண்டு புகார் அளித்தனர். சுரேஷ்பாபுவால் ஏமாற்றப்பட்டோரில் பாதி பேர் பெண்கள். வீட்டில் சுயமாக தொழில்துவங்கி குடும்பத்தின் பணத் தேவையை பூர்த்தி செய்து கொள்ளும் முனைப்பில் மெழுகுவர்த்தி தயாரிக்கும் தொழிலில் இறங்கியவர்கள்.