பல்லடம்:பல்லடத்தில் மனமகிழ்மன்றம் என்ற பெயரில் சூதாட்ட கிளப் நடத்திய தி.மு.க., ஒன்றிய இளைஞரணி அமைப்பாளர் உள்ளிட்ட 19 பேரை போலீசார் கைது செய்தனர்.பல்லடம்- மங்கலம் ரோட்டில் மனமகிழ் மன்றம் நடத்தியவர் தங்கவேல்(45); பல்லடம் ஒன்றிய தி.மு.க., இளைஞரணி அமைப்பாளர். மனமகிழ்மன்றத்தில் மதுஅருந்தியபடி சீட்டு விளையாடுவதாக பல்லடம் போலீசாருக்கு தகவல் கிடைத்தது.

இன்ஸ்பெக்டர் தவமணி தலைமையில் போலீசார், மனமகிழ்மன்றத்தில் திடீர் சோதனை நடத்தினர்; அங்கு சூதாடிக்கொண்டிருந்த மனமகிழ்மன்றத்தின் உரிமையாளர் தங்கவேல்(45) மற்றும் ராதாகிருஷ்ணன்(49) சண்முகசுந்தரம்(29), பாலகிருஷ்ணன்(46), பாஸ்கர்(41), ஷேக்சிந்தா(39), பாபு(43) ,குமரேஷ் (28) உள்ளிட்ட 19 பேரை போலீசார் கைது செய்தனர். இவர்களிடம் இருந்து சூதாட்ட பணம் 23 ஆயிரம் ரூபாயை போலீசார் கைப்பற்றினர்; 19 மதுபான பாட்டில்களை பறிமுதல் செய்தனர். சூதாட்டத்தில் பிடிபட்டவர்களில் மற்ற சிலரும், தி.மு.க., சார்ந்தவர்கள் என விசாரணையில் தெரிய வந்தது.