PUBLISHED ON : அக் 13, 2011 12:00 AM
தமிழக பா.ஜ., தலைவர் பொன்.ராதாகிருஷ்ணன்: தமிழக மக்களை, 45 ஆண்டுகளாக தி.மு.க., - அ.தி.மு.க., ஆகிய இரண்டு கட்சிகளும் ஏமாற்றி வருகின்றன. ஐந்து மாதத்துக்கு முன், தி.மு.க.,வின் மோசமான ஆட்சியை ஒழிக்க, அ.தி.மு.க.,வுக்கு வாய்ப்பு தந்தீர்கள்; ஆட்சிக்கு வந்து ஐந்து மாதங்களில் ஏதாவது மாற்றம் வந்துள்ளதா?
டவுட் தனபாலு: தெரியலை... ஆனா, 'புதிய ஆட்சி வந்து ஆறு மாதங்கள் வரை விமர்சிக்க மாட்டேன்'னு சொன்ன உங்க நிலைப்பாடுல தான் மாற்றம் வந்திருக்கு...!
பத்திரிகைச் செய்தி: உள்ளாட்சித் தேர்தலை முன்னிட்டு தமிழகம் முழுவதும், 'டாஸ்மாக்' கடைகள், ஆறு நாட்கள் செயல்படாது என அறிவிக்கப்பட்டுள்ள நிலையில், சரக்கு பதுக்கல் துவங்கி உள்ளது.
டவுட் தனபாலு: அப்போ, வீட்டுக்கு வீடு அரிசி மூட்டை போடுறதுக்கு பதிலா, ஆறு குவார்ட்டர் பாட்டில் போடுற கட்சி தான் ஜெயிக்கும்னு நினைக்கிறேன்...!
தி.மு.க., தலைவர் கருணாநிதி: நான் எழுப்பிய குற்றச்சாட்டுக்கு முதல்வரோ, அமைச்சர்களோ பதிலளிக்காமல், கலெக்டர் பொறுப்பில் உள்ளவரை விளக்கம் கூற வைத்திருப்பதால், அரசிடம் நியாயமான பதில் இல்லை எனத் தெரிகிறது. தனிப்பட்ட சங்கத்திற்கு, செம்மொழிப் பூங்காவுக்கு எதிரே உள்ள இடத்தைக் கொடுத்ததை, அவர் மறுக்கவில்லை; ஒப்புக்கொண்டுள்ளார்.
டவுட் தனபாலு: 'தோட்டக்கலைச் சங்கத்துக்குச் சொந்தமான இடம்; அதனால அவங்களுக்கே கொடுத்துட்டேன்'னு சொல்லியிருக்கார்... நீங்க என்னமோ, கொலைக் குற்றத்தை ஒப்புக்கிட்ட மாதிரி சொல்றீங்களே...!