பரமக்குடியில் இம்மானுவேல் சேகரனின் 54வது நினைவுநாள் நேற்றுமுன்தினம் அனுஷ்டிக்கப்பட்டது. இந்நிகழ்ச்சியில் பங்கேற்க தன் ஆதரவாளர்களுடன் செல்ல முயன்ற தமிழக மக்கள் முன்னேற்றக்கழகத்தலைவர் ஜான் பாண்டியனை போலீசார் வல்லநாட்டில் வழிமறித்து துப்பாக்கி சுடும் தளத்திற்கு அழைத்துச்சென்றனர். அவர் தன் ஆதர்வாளர்களுடன் அங்கு சிறை வைக்கப்பட்டுள்ளார். இதை கண்டித்து ஜான் பாண்டியன் ஆதரவாளர்கள் பரமக்குடியில் சாலைமறியலில் ஈடுபட்டனர். போராட்டக்குழுவினருக்கும், போலீசாருக்கும் இடையே தகராறு ஏற்பட்டது. போராட்டம் கலவரமாக மாறியது. போலீசார் துப்பாக்கிச்சூடு, தடியடி நடத்தியதில் ஆறு பேர் இறந்தனர். இச்சம்பவம் எதிரொலியாக நெல்லை, தூத்துக்குடி மாவட்டங்களில் பதட்ட நிலை ஏற்பட்டது. நேற்றுமுன்தினம் இரவு நெல்லை பஸ்ஸ்டாண்டில் இருந்து சுற்றுப்பகுதி கிராமங்களுக்கு பஸ்கள் செல்லவில்லை. நெல்லை புதிய பஸ்ஸ்டாண்டில் இருந்து சங்கரன்கோவில், ராஜபாளையம், ஸ்ரீவில்லிபுத்தூர், பாபநாசம், தேனி, குமுளி, நான்குநேரி, களக்காடு, வள்ளியூர், புளியங்குடி உள்ளிட்ட பகுதிகளுக்கு பஸ்சர்வீஸ் ரத்து செய்யப்பட்டது. வெளியூர் மக்கள் ஊர் திரும்ப வழியின்றி பஸ்ஸ்டாண்டில் தவித்தனர். பஸ்கள் இயக்கப்படாததை பயன்படுத்தி சில வழித்தடங்களில் வேன்கள், கார்கள் இயக்கப்பட்டன. அந்த வாகனங்களில் பஸ் கட்டணத்தை விட 2, 3 மடங்கு கூடுதல் கட்டணம் வசூலிக்கப்பட்டது. மக்கள் வேறுவழியின்றி கூடுதல் கட்டணம் அளித்து பயணம் செய்தனர்.