முதுகுளத்தூர் : முதுகுளத்தூர் அருகே பூக்குளம் கூட்டுறவு வங்கியில் வழங்கபட்ட இழப்பீடு தொகைக்கான காசோலை போலியாக இருக்கும் என்ற சந்தேகத்தால் திருப்பி அனுப்பப்பட்டது.

விவசாயி மாதவன் கூறும்போது, ''எனக்கு வழங்கபட்ட காசோலையில் தேதி குறிப்பிடபடாமல், அதிகாரி கையெழுத்து திருத்தம் செய்யபட்டிருந்ததால் மத்திய வங்கியில் பணபட்டுவாடா செய்ய மறுத்தனர். ஆனால் இதுகுறித்த தகவல் வெளியே தெரிந்ததும் கூட்டுறவு வங்கியினர் வீட்டிற்கே வந்து, போலி காசோலையை பெற்று பணத்தை கொடுத்தனர்,'' என்றார். கடலாடி மத்திய வங்கி கிளை மேலாளர் ஜோசப் மேரி கூறியதாவது: பூக்குளம் கூட்டுறவு வங்கியில் பயனாளிகளுக்கு வழங்கபட்ட காசோலையில் தேதி பூர்த்தி செய்யாமல், தனி அலுவலர் கையெழுத்து அடிக்கப்பட்டதால் காசோலை முறைகேடு நடந்துள்ளதா, என்ற சந்தேகத்தால் பணம் வழங்காமல் திருப்பி அனுப்பினோம், என்றார்.