கோவை : பாரதியார் பல்கலை அனைத்து கல்லூரி மாணவியருக்கான வாலிபால் போட்டியில், பாரதியார் பல்கலை வெற்றி பெற்றது. இப்போட்டி கோவை மேலாண்மை தொழில்நுட்பக் கல்லூரியில் நேற்று துவங்கியது. கோவை, திருப்பூர், கோபி ஆகிய இடங்களைச் சேர்ந்த 18 கல்லூரி அணிகள் போட்டியில் பங்கேற்றன. கோவை கலைமகள் கலை அறிவியல் கல்லூரி முதல்வர் நடராஜன் தலைமை வகித்தார். கல்லூரி இயக்குனர் சின்னராஜ் போட்டியை துவக்கினார். கல்லூரி உடற்கல்வி இயக்குனர் லோகேஸ்வரன் வரவேற்றார். காலிறுதி 'நாக்வுட்' போட்டி முடிவுகள்:

முதல் போட்டியில் பி.எஸ்.ஜி.ஆர்.,கிருஷ்ணம்மாள் கல்லூரி 2-1 என்ற செட் கணக்கில் வெள்ளாளர் கல்லூரியையும், இரண்டாவது போட்டியில் பாரதியார் பல்கலை 2-1 செட் கணக்கில் டாக்டர் என்.ஜி.பி.,கலை அறிவியல் கல்லூரியையும் வென்றன. மூன்றாவது போட்டியில் கோபி பி.கே.ஆர்.,கலை அறிவியல் கல்லூரி 2-0 என்ற செட் கணக்கில் சி.எம்.எஸ்.,கலை அறிவியல் கல்லூரியையும், நான்காவது போட்டியில் நிர்மலா பெண்கள் கல்லூரி 2-0 என்ற செட் கணக்கில் திருப்பூர் எல்.ஆர்.ஜி., அறிவியல் கல்லூரியையும் வென்றன. பாரதியார் பல்கலை, பி.எஸ்.ஜி.ஆர்.,கிருஷ்ணம்மாள் கல்லூரி, நிர்மலா பெண்கள் கல்லூரி, பி.கே.ஆர்.,கலை கல்லூரி ஆகியன லீக் போட்டியில் விளையாட தகுதி பெற்றன.