உலகின் பிரபல சமூக இணையதளம் 'பேஸ்புக்'. இதில், மத்தியப் பிரதேச முதல்வர் சிவ்ராஜ் சிங் சவுகான் பெயரில், போலிக் கணக்கு துவங்கிய விஷமி ஒருவர், அந்தத் தளத்தில் சர்ச்சைக்குரிய புகைப்படங்களையும், மூத்த காங்., தலைவர்களை கேலி செய்யும் கார்ட்டூன்களையும், வெளியிட்டு வந்தார். இதனால் அதிர்ச்சியடைந்த முதல்வர் சவுகான், இது தொடர்பாக சைபர் கிரைம் போலீசில் புகார் செய்தார். அதன்பேரில், போலீஸ் குழு ஒன்று ஏற்படுத்தப்பட்டு, விசாரணை நடந்தது. முதற்கட்டமாக, 'பேஸ்புக்' இணையதளத்தின் இந்தியப் பிரிவு அலுவலகத்திடம் உதவி கேட்கப்பட்டது. எனினும், இதுபற்றி தகவல் தெரிவிக்க, இந்திய அலுவலகம் மறுத்துவிட்டது. இதையடுத்து, இன்டர்போல் உதவியுடன், 'பேஸ்புக்' தளத்தின் தலைமை அலுவலகத்தின் கவனத்திற்கு, இவ்விவகாரம் கொண்டுசெல்லப்பட்டது.