மதுரையில் தமிழக தொல்லியல் கழக இரண்டு நாள் கருத்தரங்கு நேற்று துவங்கியது. துவக்க விழாவில் ஆவண இதழ் வெளியிடப்பட்டது. பாண்டியநாட்டு வரலாற்று பேரவை சார்பில் நடந்த இந்நிகழ்ச்சிக்கு தொல்லியல் கழக தலைவர் ராஜகோபால் தலைமை வகித்தார். சாந்தலிங்கம் வரவேற்றார். ஆவண இதழை வெளியிட்ட பேராசிரியர் ஞானசம்பந்தன் பேசுகையில், ''நம்நாட்டு பெருமைகளை தொல்லியல் துறை அனைவருக்கும் தெரியப்படுத்த வேண்டும். மதுரை நகரம் எத்தனையோ வரலாற்று பெருமைகளைக் கொண்டது. இதை இன்றைய இளைஞர்களிடம் எடுத்துக் கூறி, அடுத்த தலைமுறையினருக்குக் கொண்டு செல்ல வேண்டும். சுற்றுலா பாரம்பரியமிக்க தலங்களில், அவற்றின் வரலாற்றை பிரபலமானவர்களின் குரலின் பின்னணியில், ஒலி, ஒளிகாட்சிகளை அமைத்து செயல்படுத்தலாம்,'' என்றார்.