நியூயார்க் : அன்னா ஹசாரேவின் ஜன் லோக்பால் மசோதா தொடர்பான உண்ணாவிரத போராட்டம் வெற்றி அடைந்ததை அமெரிக்காவில் வாழும் இந்தியர்கள் உற்சாகமாகக் கொண்டாடி வருகின்றனர்.

மேலும் இது மக்களின் சக்தியையும் இந்திய ஜனநாயகத்திற்கு கிடைத்த வெற்றியையும் காட்டுகிறது என அவர்கள் தெரிவித்துள்ளனர்.நியூஜெர்சி மற்றும் போஸ்டனில் வாழும் சமூக ஆர்வலர்கள் பலர் ஊழலுக்கு எதிரான இந்தியா போராட்டத்திற்கு ஆதரவு வழங்கி வந்தனர். அன்னா ஹசாரேவின் 12 நாள் உண்ணாவிரத போராட்டத்தையும் உலகம் முழுவதம் வாழும் இந்தியர்கள் கவனித்து வந்ததாக கூறிய அவர்கள் இந்திய தேசிய கொடி மற்றும் ஜன் லோக்பால் மசோதாவிற்கு ஆதரவான பேனர்களை கையில் ஏந்தி நியூஜெர்சி வீதிகளில் வலம் வந்தனர். இனிப்புக்கள் வழங்கியும், இந்திய தேசியகீதத்தை பாடியும் அவர்கள் தங்களின் மகிழ்ச்சியை வெளிப்படுத்தினர். இந்திய மக்களின் சக்தி மற்றும் ஒற்றுமையை உலகத்திற்கு எடுத்துக்காட்டுவதாக இந்த வெற்றி அமைந்துள்ளதாக அவர்கள் பெருமையுடன் தெரிவித்துள்ளனர்.