ஆரப்பாளையம் பஸ் ஸ்டாண்டிலிருந்து வரும் அரசு டவுன் பஸ்கள் மாநகராட்சி மகப்பேறு மருத்துவமனை எதிரே உள்ள பஸ் ஸ்டாப்பில் நிற்பதில்லை. நிழற்குடை பயனின்றி உள்ளது. சிவானந்தா ரோட்டிலிருந்து ஆரப்பாளையம் பஸ் ஸ்டாண்ட் செல்லும் பஸ்கள் நிற்க, மணிஷ் பேக்கரி அருகே இடம் ஒதுக்கப்பட்டுள்ளது. இதை டிரைவர்கள் கண்டுகொள்வதில்லை. பஸ் ஸ்டாண்ட் பகுதியிலிருந்து நகரின் பிற பகுதிகளுக்குச் செல்ல, சந்திப்பிலுள்ள திருமலை நாயக்கர் சிலையைச் சுற்றி சிவானந்தா ரோட்டிற்கு திரும்ப வேண்டும்.

விதியை மீறி பஸ் ஸ்டாண்ட் மற்றும் சிவானந்தா ரோட்டிலிருந்து வரும் பஸ்களை ஆரப்பாளையம் முதல் தெரு சந்திப்பு வேகத்தடை அருகே எதிர் எதிரே நிறுத்துகின்றனர். விபத்து அபாயத்தை டிரைவர்கள் உணர்வதில்லை. மாநகராட்சி மருத்துவமனை எதிரே காத்திருக்கும் பயணிகள் ரோட்டை கடந்து ஓட்டமும், நடையுமாக பஸ்களில் இடம் பிடிக்க வேண்டியுள்ளது. காலை, மாலையில் பள்ளி மாணவர்கள் பாடு திண்டாட்டம்.மாநகராட்சி மருத்துவமனை எதிரே ரோட்டை அடைத்துக்கொண்டு மின்சார 'டிரான்ஸ்பார்மர்' உள்ளது. ஆபத்தை உணராமல், நிழலுக்கு அங்கு பயணிகள் ஒதுங்குகின்றனர். சிலை அருகே புட்டுத்தோப்பு ரோட்டை ஆக்கிரமித்து, கடைகளுக்கு முன் வாகனங்களை நிறுத்துகின்றனர். புட்டுத்தோப்பு ரோடு முழுவதும் கண்டபடி வாகனங்களை நிறுத்துகின்றனர். ஆட்டோக்கள் தொல்லை இருப்பதால், போக்குவரத்து நெரிசல் ஏற்படுகிறது.தீர்வு: கிராஸ் ரோடு சந்திப்பில் அனுமதிக்கப்பட்ட பஸ் ஸ்டாப்களில் பஸ்களை நிறுத்த வேண்டும். விதி மீறும் வாகனங்கள் மீது போலீசார் நடவடிக்கை எடுக்க வேண்டும். மின்சார டிரான்ஸ்பார்மரை இடமாற்ற வேண்டும். இச்சந்திப்பு அருகே மூன்று ரோடுகளிலும் பிளாட்பார ஆக்கிரமிப்புகளை அகற்ற வேண்டும். சிவானந்தா ரோடு பஸ் ஸ்டாப் அருகே உள்ள குப்பைத்தொட்டியை வேறு இடத்திற்கு மாற்ற வேண்டும்.