கோவை:தென்மண்டல அளவில் அனைத்து பல்கலை டேபிள் டென்னிஸ் போட்டி மாணவர் பிரிவில், சென்னை எஸ்.ஆர்.எம்.,பல்கலையும், மாணவியர் பிரிவில் புதுச்சேரி பல்கலையும் பைனலில் விளையாட தகுதி பெற்றன. எட்டிமடை அமிர்தா பல்கலை சார்பில் தமிழ்நாடு, கேரளா, ஆந்திரா, கர்நாடகா மாநிலங்களை சேர்ந்த அனைத்து பல்கலை மாணவ, மாணவியருக்கான டேபிள்டென்னிஸ் (மேஜைப்பந்து) போட்டி கடந்த மூன்று நாட்களாக நடந்து வருகிறது.

49 பல்கலையை சேர்ந்த 196 மாணவர்களும், 42 பல்கலையை சேர்ந்த 168 மாணவியரும் ஒற்றையர் பிரிவு 'நாக்அவுட்' முறை போட்டியில் பங்கேற்றனர்.கடந்தாண்டு அரை இறுதியில் தகுதி பெற்ற சென்னை பல்கலை, எஸ்.ஆர்.எம்.,பல்கலை, பாரதியார் பல்கலை, பெல்காம் வி.டி.,பல்கலை ஆகிய மாணவர் அணிகளும்; சென்னை பல்கலை, அண்ணா பல்கலை, மதுரை காமராஜர் பல்கலை, பெல்காம் வி.டி.பல்கலை ஆகிய மாணவியர் அணிகள் இந்தாண்டு நேரடி காலிறுதிக்கும் விளையாட தகுதி பெற்றன.

மற்ற நாக்அவுட் மூன்றாவது சுற்று வரை வெற்றி பெற்ற அணிகள் காலிறுதியில் மோதின.மாணவர் பிரிவு முதல் காலிறுதியில் பெல்காம் வி.டி.,பல்கலை 3-0 செட் கணக்கில் பெங்களூர் ஜெயின் பல்கலை அணியையும், 2வது போட்டியில் எஸ்.ஆர்.எம்.,பல்கலை 3-0 செட் கணக்கில் குண்டூர் கே.எல்.ஈ.எஸ்., பல்கலை அணியையும், 3வது போட்டியில் அமிர்தா 3-1 செட் கணக்கில் பாரதியார் பல்கலையையும், 4வது போட்டியில் கோட்டயம் மகாத்மா காந்தி பல்கலை 3-1 செட் கணக்கில் சென்னை பல்கலையையும் வென்றன.

அரைஇறுதியில் எஸ். ஆர்.எம்., பல்கலை 3-2 செட் கணக்கில் பெல்காம் வி.டி.பல்கலையையும், மற்றொரு அரை இறுதியில் மகாத்மா காந்தி பல்கலை 3-0 செட் கணக்கில் அமிர்தா பல்கலையையும் வென்றன. மாணவியர் பிரிவு முதல் காலிறுதியில் வி.டி.,பல்கலை 3-0 செட் கணக்கில் பாரதியார் பல்கலையையும், 2வது போட்டியில் திருநெல்வேலி எம்.எஸ்., பல்கலை 3-0 செட் கணக்கில் மதுரை காமராஜர் பல்கலையையும், 3வது போட்டியில் புதுச்சேரி பல்கலை 3-0 செட் கணக்கில் அண்ணா பல்கலையையும், 4வது போட்டியில் சென்னை பல்கலை 3-0 செட் கணக்கில் ஆந்திரா கிருஷ்ணா பல்கலையையும் வென்றன.அரைஇறுதியில் புதுச்சேரி பல்கலை 3-0 செட் கணக்கில் பெல்காம் வி.டி., பல்கலையையும், மற்றொரு அரைஇறுதி போட்டியில் சென்னை பல்கலை 3-0 செட் கணக்கில் நெல்லை எம்.எஸ்.,பல்கலையையும் வென்றன.