ஸ்ரீநகர்: ஜம்மு- காஷ்மீரில் தேர்தல் நடத்துவதற்காக, தலைமைத் தேர்தல் கமிஷனர் ராஜிவ் குமார் மற்றும் தேர்தல் கமிஷனர்கள் ஞானேஷ்குமார், எஸ்.எஸ். சந்து ஆகியோர் வரும் ஆகஸ்ட் 8ம் தேதி முதல் 10ம் தேதி வரை அம்மாநிலத்தில் சுற்றுப்பயணம் மேற்கொள்ள உள்ளனர்.

ஜம்மு-காஷ்மீருக்கு சிறப்பு அந்தஸ்து வழங்கும் 370 சட்டப்பிரிவு கடந்த 2019-ம் ஆண்டு ஆக.05ம் தேதி நீக்கப்பட்டது. இதையடுத்து மாநிலம் இரு யூனியன் பிரதேசங்களாக பிரிக்கப்பட்டது. கடந்த மாதம் கார்கில் சென்றிருந்த பிரதமர் மோடி ஜம்மு-காஷ்மீருக்கு சட்டசபை தேர்தல் விரைவில் நடைபெறும் என உறுதியளித்தார்.

ஆகஸ்ட் 10ம் தேதி ஜம்முவில் செய்தியாளர்களை தேர்தல் கமிஷனர்கள் சந்திக்க உள்ளனர். செப்டம்பர் 30ம் தேதிக்குள் சட்டசபை தேர்தல் நடத்தி முடிக்க தேர்தல் கமிஷன் திட்டமிட்டுள்ளது.