புதுடில்லி: எதிர்க்கட்சி தலைவர் ராகுலுக்கு, சுனேஹ்ரி பாக் சாலையில் புது வீடு ஒன்றை ஒதுக்கீடு செய்து லோக்சபா குழு பரிந்துரை செய்துள்ளது. இது குறித்து ராகுல், இன்னும் பதிலளிக்கவில்லை எனக்கூறப்படுகிறது.

லோக்சபா எம்.பி., ஆனது முதல் ராகுல் டில்லியில், 12, துக்ளக் லேன் என்ற முகவரி கொண்ட வீட்டில் வசித்து வந்தார். அவதூறு வழக்கில் தகுதியிழப்பு செய்யப்பட்டதால் அந்த வீட்டை காலி செய்த ராகுல், ஜன்பத் சாலையில் வசிக்கும் தாயார் சோனியாவுடன் வசித்து வந்தார். தகுதி நீக்கம் நிறுத்தி வைக்கப்பட்டாலும், வேறு வீட்டிற்கு ராகுல் மாறவில்லை.

சமீபத்தில் நடந்து முடிந்த தேர்தலில் வெற்றி பெற்ற ராகுல், தற்போது எதிர்க்கட்சி தலைவராக பொறுப்பேற்றுள்ளார். மத்திய அமைச்சர் அந்தஸ்துக்கு இணையான இந்த பதவியில் அவர் உள்ளதால், அவர்களுக்கு ஒதுக்கப்படும் வீட்டை போல், ராகுலுக்கும் ஒதுக்கப்படும்.

இந்நிலையில், சுனேஹ்ரி பாக் சாலையில் உள்ள எண் 5 கொண்ட பங்களாவை ராகுலுக்கு ஒதுக்க லோக்சபா குழு பரிந்துரை செய்துள்ளதாக தகவல் வெளியாகி உள்ளது. இந்த வீட்டை அவரது சகோதரி பிரியங்கா நேரில் பார்வையிட்டு சென்றுள்ளார். இதனால், காங்., தொண்டர்கள் மத்தியில் இந்த வீடு குறித்து எதிர்பார்ப்பு எழுந்துள்ளது. அதேநேரத்தில் இந்த வீட்டை ஏற்பது குறித்து ராகுல் இன்னும் பதிலளிக்கவில்லை என டில்லி வட்டாரங்கள் தெரிவித்து உள்ளன.