ஷாங்காய்: ஷாங்காய் மாஸ்டர்ஸ் டென்னிஸ் ஒற்றையரில் மொனாக்கோ வீரர் வாலண்டைன் சாம்பியன் பட்டம் வென்றார்.

சீனாவில், ஆண்களுக்கான ஷாங்காய் 'மாஸ்டர்ஸ் 1000' டென்னிஸ் தொடர் நடந்தது. இதன் ஒற்றையர் பிரிவு பைனலில் உலகின் 'நம்பர்-204' மொனாக்கோவின் வாலண்டைன் வச்செரோட் 26, ஏ.டி.பி., தரவரிசையில் 54வது இடத்தில் உள்ள பிரான்சின் ஆர்தர் ரின்டெர்க்னெக் 30, மோதினர். இருவரும் உறவினர்கள்.

முதல் செட்டை 4-6 என இழந்த வாலண்டைன், பின் எழுச்சி கண்டு 2வது செட்டை 6-3 எனக் கைப்பற்றினார். வெற்றியாளரை நிர்ணயிக்கும் 3வது செட்டில் மீண்டும் அசத்திய இவர், 6-3 என வென்றார்.

இரண்டு மணி நேரம், 14 நிமிடம் நீடித்த போட்டியில் அபாரமாக ஆடிய வாலண்டைன் 4-6, 6-3, 6-3 என்ற கணக்கில் வெற்றி பெற்று, ஏ.டி.பி., ஒற்றையர் பிரிவில் முதன்முறையாக கோப்பை வென்றார். இதன்மூலம் ஏ.டி.பி., 'மாஸ்டர்ஸ் 1000' டென்னிஸ் வரலாற்றில், தரவரிசையில் பின்தங்கிய வீரர் முதன்முறையாக சாம்பியன் ஆனார். தவிர, 'மாஸ்டர்ஸ் 1000' பட்டம் வென்ற முதல் மொனாக்கோ வீரரானார்.