சரக்கு வாகனங்கள் படையெடுப்பு சாலைகளில் போக்குவரத்து நெரிசல் சென்னை, திருவள்ளூர், காஞ்சிபுரம், செங்கல்பட்டு மாவட்டங்களில், கடந்த நான்கு நாட்களாக மழை பெய்தது. சாலைகளில் ஆங்காங்கே நீர் தேங்கி போக்குவரத்து பாதிக்கப்பட்டது. இதனால், சென்னைக்குள் சரக்கு வாகனங்கள் வர முடியவில்லை. தேசிய நெடுஞ்சாலைகளில் உள்ள சுங்கச்சாவடிகள், மாநில நெடுஞ்சாலைகளின் ஓரங்கள், காலியாக உள்ள இடங்களில் சரக்கு வாகனங்கள் நிறுத்தி வைக்கப்பட்டன. கனமழை எச்சரிக்கை காரணமாக, பல்வேறு மாவட்டங்களில் இருந்து சரக்கு வாகனங்கள் சென்னைக்கு புறப்படவில்லை. மூன்று நாட்களுக்கு பின், மழை ஓய்ந்து, சென்னையில் வெயில் காட்ட துவங்கியுள்ளது. இதையடுத்து, பல்வேறு மாநிலங்கள் மற்றும் மாவட்டங்களில் இருந்து பொருட்களை ஏற்றுவதற்கும், இறக்குவதற்கும், சரக்கு வாகனங்கள் அதிகளவில் சென்னைக்கு வந்து செல்ல துவங்கியுள்ளன. 'பார்சல்' பொருட்களை ஏற்றிச்செல்வதற்கு ஆம்னி பேருந்துகளும், நேற்று முதல் இயல்பு நிலைக்கு வந்துள்ளன. இதனால், மாதவரம் நெடுஞ்சாலை, ஜி.என்.டி., சாலை உள்ளிட்ட முக்கிய சாலைகளில் போக்குவரத்து நெரிசல் அதிகரித்துள்ளது. சென்னைக்கு அவசர பணிக்காக புறப்பட்டோரும், சென்னையில் இருந்து வெளியே செல்ல புறப்பட்டோரும், குறித்த நேரத்திற்கு செல்ல முடியாமல் அவதிக்குள்ளாகினர். தி.நகர், வண்ணாரப்பேட்டை, பாரிமுனை, சவுக்கார்பேட்டையில் உள்ள மொத்த விற்பனை கடைகளுக்கு தடைபட்ட லாரிகள் வரத்தும் துவங்கியுள்ளது.