தென் மாநிலங்களில் எந்த மொழி புத்தாண்டாக இருந்தாலும், வழக்கமான இனிப்பு வகைகளையே செய்து வருகிறோம். இம்முறை வட மாவட்டங்களில் தீபாவளி, ஹோலி, நவராத்திரி பண்டிகைகளில் தயாரிக்கப்படும் 'மால்புவா' இனிப்பு எப்படி செய்வது என்று பார்க்கலாம்.

செய்முறை

 ஒரு பாத்திரத்தில் அரை லிட்டர் காய்ச்சிய பால், 250 கிராம் மைதா மாவு எடுத்து கொள்ளவும். ஒரு சிட்டிகை சோம்பு பொடி, அரை டீஸ்பூன் ஏலக்காய் துாள், ஒரு கிராம் குங்குமப் பூ சேர்க்கவும்.

 அடுத்ததாக, 75 கிராம் ஸ்வீட் கோவா போட்டு குறைந்தது 10 நிமிடம் கலக்கவும். மாவில் கட்டி இருக்கக் கூடாது. இறுதியாக ஒரு சிட்டிகை உப்பு சேர்த்து, 15 நிமிடங்களுக்கு தனியாக வைக்கவும்.

 இதற்கிடையில், குலாப் ஜாமூனுக்கு தயாரிப்பது போல, சர்க்கரை பாகு தயார் செய்து கொள்ளுங்கள்.

 கடாயில் கால் லிட்டர் கடலை எண்ணெய் ஊற்றி சூடுபடுத்தவும். எண்ணெய் சூடானவுடன், மிதமாக மாற்றவும்.

 கடாயில் மாவு ஊற்றும் முன், இரண்டு ஸ்பூன் தண்ணீர் ஊற்றுங்கள். மால்புவா பஞ்சு போல வரும்.

 அதிரசம் சுடுவது போன்று மாவு எடுத்து, முக்கால் கரண்டி ஊற்றி, பொன்னிறத்துக்கு மாறும் வரை வறுக்கவும். குறைந்தது, 6 - 8 நிமிடங்களுக்கு வறுத்த பின், சர்க்கரை பாகில், 30 நிமிடங்கள் ஊறவைக்கவும்

 பரிமாறும் முன், மால்புவா மீது ஒரு ஸ்பூன் வெண்ணிலா ஐஸ் கிரீம் வைத்துக் கொடுங்கள். சாப்பிட்டுக் கொண்டே இருப்பர்.

- நமது நிருபர் -