நெட்பிளிக்ஸில் அதர்வாவின் ‛இதயம் முரளி'! அதிகாரப்பூர்வ ரிலீஸ் தேதி அறிவிப்பு!

அதர்வா நடிப்பில் ஜூலை 10ல் வெளியான படம் ‛இதயம் முரளி'. தியேட்டர்களில் ஓடி முடித்துள்ள இப்படம், ஆகஸ்ட் 7ம் தேதி முதல் ஓடிடியில் ஸ்ட்ரீமிங் ஆகும் என்பதை நெட்பிளிக்ஸ் நிறுவனம் அதிகாரப்பூர்வமாக அறிவித்துள்ளது. இருப்பினும், இப்படம் தமிழ் தவிர வேறு எந்தெந்த மொழிகளில் வெளியாகிறது என்பது குறித்த அறிவிப்பை நெட்பிளிக்ஸ் இன்னும் வெளியிடவில்லை.

இப்படத்தில் அதர்வாவுடன் ப்ரீத்தி முகுந்தன், கயாடு லோஹர், ஜோனிதா காந்தி, மாளவிகா மோகனன் ஆகியோர் முக்கியக் கதாபாத்திரங்களில் நடித்துள்ளனர். மேலும், நடிகர் பஹத் பாசில் இப்படத்தில் சிறப்புத் தோற்றத்தில் நடித்துள்ளார். தமன் இசையமைத்துள்ளார். டான் பிக்சர்ஸ் பேனரின் கீழ் ஆகாஷ் பாஸ்கரன் தயாரித்து இயக்கியுள்ள இதயம் முரளி டிஜிட்டல் வெளியீட்டின் மூலம் உலகளவில் இன்னும் அதிகமான பார்வையாளர்களைச் சென்றடையும் என எதிர்பார்க்கப்படுகிறது.

மேலும், அதர்வாவின் தந்தையும், 80 மற்றும் 90களின் பிரபல காதல் நாயகனுமான மறைந்த நடிகர் முரளி நடித்த ‛இதயம்' படத்தின் நினைவாகவும், அவருக்கு மரியாதை செலுத்தும் விதமாகவும் இப்படத்திற்கு இதயம் முரளி எனப் பெயரிடப்பட்டது என்பது குறிப்பிடத்தக்கது.