சென்னை: மாவட்ட அளவிலான மாஸ்டர்ஸ் தடகளப் போட்டியில், 626 வீரர் - வீராங்கனையர் உற்சாகமாக பங்கேற்று, திறமையை வெளிப்படுத்தினர்.

சென்னை மாவட்ட மாஸ்டர்ஸ் தடகள சங்கம் சார்பில், சென்னை அளவிலான மூத்தோர் தடகள சாம்பியன்ஷிப் போட்டி, பெரியமேடு, நேரு விளையாட்டு அரங்கில் நேற்று நடந்தது.

போட்டியில், 30 வயது முதல் 97 வயது வரையிலான மொத்தம், 626 வீரர் - வீராங்கனையர் உற்சாகமாக பங்கேற்று திறமையை வெளிப்படுத்தினர்.

இதில், '50 பிளஸ்' பிரிவில், 'தினமலர்' நாளிதழ் டிஜிட்டல் பிரிவு நிர்வாகி பாலசுப்ரமணியன், 50, பங்கேற்று, 200 மீ., ஓட்டத்தில் தங்கம், 100 மீ., ஓட்டத்தில் வெண்கலம் வென்று அசத்தினார்.

அதேபோல், 50 வயதுடைய சுரேஷ், 100 மீ., ஓட்டத்தில் தங்கம்; 48 வயதுடைய பிந்து கணேஷ், 100 மற்றும் 400 மீ., ஓட்டத்தில் தலா ஒரு தங்கம் வென்றனர். 53 வயதுடைய டாக்டர் விஜயசுரேஷ், 100 மீ., ஓட்டத்தில் தங்கம்; 38 வயதுடைய அன்சியா ஹரிதாஸ், 5 கி.மீ., 'டிராக் வாக்' போட்டியில், வெண்கலம் வென்று அசத்தினர்.