திருப்பூர் : உள்ளாட்சி அமைப்புகளுக்கான தேர்தல் நடத்தும் வகையில், வார்டுவாரியான வாக்காளர் பட்டியலை சமர்ப்பிக்க, மாநில தேர்தல் கமிஷன் அறிவுறுத்தியுள்ளது.

மாநில தேர்தல் கமிஷன் செயலாளர் பாலசுப்ரமணியம், முதன்மை வாக்காளர் பதிவு அலுவலர் மற்றும் மாவட்ட வாக்காளர் பதிவு அலுவலர்களுக்கு அனுப்பிய சுற்றறிக்கை:

தமிழகத்தில் காலியாக உள்ள உள்ளாட்சி அமைப்புகளின் பதவிகளுக்கு விரைவில் தேர்தல் நடத்தப்படவுள்ளது. தேர்தலுக்கு முன் வாக்காளர் பட்டியல் தயார் செய்து வெளியிட வேண்டும்.

கடந்த லோக்சபா தேர்தலுக்கு முன் வெளியிடப்பட்ட வாக்காளர் பட்டியல் விவரம்; பின்னர் மேற்கொள்ளப்பட்ட சேர்க்கை மற்றும் நீக்கம் விவரங்களுடன், வாக்காளர் படத்துடன் கூடிய, வார்டு வாரியான வாக்காளர் பட்டியல் தயார் செய்து வழங்க வேண்டும்.

அதனடிப்படையில் மாநில தேர்தல் கமிஷன் உள்ளாட்சி தேர்தலுக்கான வாக்காளர் பட்டியலை தயார் செய்யும். உள்ளாட்சி தேர்தல் மனுத்தாக்கலுக்கு கடைசி நாள் வரையிலான மாற்றங்கள் ஏற்கப்பட்டு உரிய வாக்காளர் பட்டியல் வெளியிடப்படும். தேர்தல் குறித்து அறிவிப்புகள் மாநில தேர்தல் கமிஷன் மூலம் வெளியிடப்படும்.இவ்வாறு அதில் கூறப்பட்டுள்ளது.

மாநில தேர்தல் கமிஷன் பிறப்பித்த இந்த உத்தரவையடுத்து வார்டு வாரியாக, புகைப்படத்துடன் கூடிய வாக்காளர் பட்டியல் தயாரிக்க சரி பார்ப்பு பணிகளில், வேகம் காட்டி வருகின்றன.