மோகன்லால் 366வது படத்தின் முதல்கட்ட படப்பிடிப்பு நிறைவு

மலையாளத்தில் மோகன்லால் நடிப்பில் வெளியான தொடரும் திரைப்படம் மிகப்பெரிய வெற்றியை பெற்று 250 கோடி வரை வசூலித்தது. இயக்குனர் தருண் மூர்த்தி இயக்கியிருந்தார். இந்த படத்தின் வெற்றியை தொடர்ந்து தற்போது இவர்கள் இருவரின் கூட்டணி மீண்டும் மோகன்லாலின் 366வது படத்திற்காக இணைந்துள்ளது. கடந்த இரண்டு மாதங்களுக்கு முன்பு இந்த படத்தின் படப்பிடிப்பு துவங்கப்பட்ட நிலையில் தற்போது இதன் முதல் கட்ட படப்பிடிப்பை நடத்தி முடித்துள்ளார் தருண் மூர்த்தி.

பொதுவாகவே மோகன்லால் படங்கள் 50 முதல் 60 நாட்களுக்குள்ளேயே படப்பிடிப்பு நிறைந்து விடும். ஆனால் இந்த படத்தின் முதல்கட்ட படப்பிடிப்பே 55 நாட்கள் நடைபெற்றுள்ளது. இதன் பிறகு தற்காலிகமாக படக்குழுவினருக்கு ஓய்வு அளிக்கப்பட்டுள்ளதாக கூறியுள்ள இயக்குனர் தருண் மூர்த்தி மீண்டும் இந்த படத்தின் இரண்டாம் கட்ட படப்பிடிப்பு வரும் மே 5ம் தேதி துவங்க இருக்கிறது என்றும் கூறியுள்ளார். இந்த இரண்டாம் கட்ட படப்பிடிப்பு மும்பையில் நடைபெறும் என சொல்லப்படுகிறது.