'நந்தா' படப்பிடிப்பு நடந்த அதே இடத்தில்...: நடிகர் கருணாஸ் உருக்கம்

மலையாளத்தில் தேசிய விருது பெற்ற திரைப்பட இயக்குனர் சஜீவ் பழூர் எழுதி இயக்கியுள்ள படம் 'என்ன விலை'. மீனவராக கருணாஷ், வக்கீலா நிமிஷா சஜயன் நடித்துள்ளனர். ராமேஸ்வரம் பின்னணியில் கதை நடக்கிறது. செப்டம்பர் 17ல் படம் ரிலீஸ்.

சென்னையில் நடந்த டிரைலர் வெளியீட்டு விழாவில் நடிகர் கருணாஸ் பேசியது: கடந்த 2001ம் ஆண்டு ராமேஸ்வரத்தில் பாலா அண்ணன் இயக்கத்தில் லொடுக்கு பாண்டியாக திரையுலகில் எனது பயணத்தை ஆரம்பித்தேன். சினிமாவுக்கு வந்து 25 ஆண்டுகள் ஆகிவிட்டது. நான் அதிகம் மலையாள படங்களை விரும்பி பார்ப்பேன். அதனால் மலையாள ரைட்டர், இயக்குனர்களுடன் டெக்னீஷியன்ஸ் உடன் இணைந்து ஒரு படமாவது பணிபுரிய ஆசைப்பட்டேன். அது இப்போது நடந்திருக்கிறது. இந்த படம் சாமானியர்களை பற்றியது. அதனால் தான் இயல்பான நடிகர்களை தேர்வு செய்துள்ளார்.

எனக்கு இன்று பெரிதாக வியாபாரம் இல்லை. இருந்தாலும் என்னை நம்பி ஏழு கோடி ரூபாய் தயாரிப்பாளர்கள் இந்த படத்தில் முதலீடு செய்திருக்கிறார்கள். அந்த அளவுக்கு அவர்களுக்கு கதை மீது நம்பிக்கை. இந்திய சினிமாவில் இதுவரை யாரும் எழுப்பாத ஒரு கேள்வியை இந்த படத்தில் இயக்குனர் சஜீவ் எழுப்பி இருக்கிறார். எனது இருபது ஆண்டு கால ஆசையை இந்த படம் நிறைவேற்றி இருக்கிறது.

அட்வகேட் கதாபாத்திரத்தில் நிமிஷா அற்புதமாக நடித்திருக்கிறார். எல்லா கதாபாத்திரங்களுக்கும் பொருத்தமானவர்களை இயக்குநர் திறமையாக தேர்வு செய்து இருக்கிறார். இந்த திரைப்படம் வெளியாவதற்கு முன்பே நெட்பிளிக்ஸ் போன்ற முன்னணி ஓடிடி தளம் விலைக்கு வாங்கி இருப்பது மகிழ்ச்சி. 'நந்தா' படத்திற்கு பிறகு என் மனதிற்கு மிகவும் நெருக்கமான திரைப்படம் இது. ராமேஸ்வரத்தில் என்னுடைய முதல் நாள் படப்பிடிப்பு நடந்த அதே இடத்தில் இந்த படத்தின் முதல் நாள் படப்பிடிப்பு நடந்தது மகழ்ச்சியாக இருக்கிறது.

இத்தனை ஆண்டுகால திரைப்பயணத்தில் என்னுடைய நடிப்பை பார்த்து என் மனைவி முதன் முதலாக இந்த படத்தில் தான் பாராட்டி இருக்கிறார். நிமிஷா மேடமும் என்னுடைய நடிப்பை பார்த்து சிலிர்த்து கட்டிப்பிடித்து கன்னத்தில் முத்தம் கொடுத்தார். படத்தில் ஜட்ஜ் ஆக நடித்த பூர்ணிமா மேடமும் போன் செய்து பாராட்டினார் நிச்சயம் இந்த படமும் என்னுடைய கதாபாத்திரமும் உங்கள் அனைவருக்கும் பிடிக்கும் என்று உறுதியாக நம்புகிறேன். இதற்கு முன்பு காசி ரீமேக்கில் நடிக்க ஆசைப்பட்டேன் அது நடக்கவில்லை இப்போது மலையாள டீயுடன் இணைந்து இருக்கிறேன் இந்த படம் பல்வேறு உலக திரைப்பட விழாக்களில் அங்கீகாரம் விருதுகளை பெற்றுள்ளது என்றார்.